Hans Sachs: Die Wittenbergisch Nachtigall (Sprache & Litteratur).

Hans Sachs: Die Wittenbergisch Nachtigall (Sprache & Litteratur). Der deutsche Dichter und Meistersinger Hans Sachs hinterließ ein umfangreiches literarisches Werk; neben rund 4 000 Liedern gehören dazu u. a. auch zahlreiche Gedichte mit historischem und politischem Inhalt. Sachs war ein Befürworter der Reformation. In dem Gedicht Die Wittenbergisch Nachtigall stellte er die Lehre Martin Luthers volkstümlich dar. Hans Sachs: Die Wittenbergisch Nachtigall Allen liebhabern Ewanngelischer warhait/ Wünsch ich Johannes Sachs Schuochmacher/ gnad vnd fryd in Christo Jesu vnserm herren. JR außerwoelten in Christo/ aller menigklich ist vnuerborgen/ in teütscher nation/ wie die Christlich gemain/ etwann lang her/ vil jar durch menschen leer etlicher Sophisten abgefuert ist worden von der warhafften freyhait des hailigen Euangelium/ vnder das schwer joch des Roemischen Bischofs woelcher vns überladen hat/ mit vil gebotten vnd gesetzen/ von woelchen vns doch Christus vnser ayniger leermayster nicht gebotten noch geleert hat/ sonder solch menschliche tradition verworffen/ wann er spricht Math. XV. Vergebens dienen sy mir in menschen gesetzen/ vnd kürtzlich hernach/ alle pflantzung die got mein hymlischer vater nit gepflantzet hat/ wirt außgereüt lat sy faren die blinden/ blinden layter/ vnd solcher sprüch seind vil im Euangeli/ wider die menschen fünd vnd gebot/ aber wir als verirrte schaeflein/ solcher haylsamen leer vnbedacht/ vnd schier gantz vergessen/ seynd gangen vnder dem Roemischen joch/ mit schwerer muee vnd grossen schaden/ ye lenger ye mer/ vnd hond dardurch das senfft joch Christi verlassen/ woelches vns Christus vnser saeligmacher beuolhen hat/ dz ist der ainig gelaub in Christo/ woelches ist dz ainig goetlich werck/ als christus sagt Johan. 6. Zuom andern ist bey vns vntergangen/ die fruchtbar lieb des naechsten/ in woelcher doch allain staet die erfüllung des gebot gotes/ vnd der propheten/ wie Christus spricht Matth. 7. Also sey wir allain peyniget gewest in den wercken die got nye gehayssen noch gebotten hat/ sonder die menschen erdicht vnd erfunden haben. Nach dem aber vorgemelt Roemisch boeß regiment/ so gar vberhand genommen/ da hat angefangen zuo schreyben/ doctor Martinus Luther/ wider vil irrthumb vnd myßbreüch/ des gaystlichen regiments/ vnangesehen ainicher person/ vnd das haylig Euangelium/ das wort Gottes (woelches vor durch menschen leer verdunckelt war) widerumb klar vnuermischt/ an den tag gegeben/ deßhalb er von dem Roemischen bischoff offt zuo widerruoffen gedrungen ist worden/ ye doch ist er almal/ als ain vnüberwundner (mit haili. schrift) vor bekanter warhait/ vnwiderrueft beliben/ deßgleichen haben sich vil Doctores gegen jm mit schreiben eingelegt/ yedoch auch nichts außgericht/ wann die goettlich warhait/ ist jn zuo starck gewest/ sonder seynd sygloß an jm worden/ deßhalb ist egemelter Doctor Martinus Luther/ in grossen beruoff kommen/ gen allermenigklich/ vnd seyn leer angenommen/ als Euangelisch/ Christlich vnd guot. Nachmalß aber ist der Roemisch hauf verzweyfelt/ an der überwindung/ mit disputieren vnd schreyben vnd woellen die Christlich gemayn/ vnder dem Roemischen joch behalten/ mit schmaehen/ lestern/ bannen/ verbieten/ verfolgen/ verbrennen/ begwaeltigen/ woelche weyß doch ain boeß ansehen hat/ vnd argkwenig ist/ vngerechter sach. Nun von disen angezaygten stucken allen/ will ich in ainer summ/ ain kurtze erklerung thon dem gemainen man (solcher handlung vnwissent) zuo vnderweysen vnd leeren/ darauß er müg erkennen die goetlich warhait/ vnd dargegen die menschlichen lugen/ darin wir gewandert haben. Zuom andern den/ so die goetlich warhait vor erkannt haben/ die zuo ermanen/ der guetige genad gottes/ der vns so reychlichen mitgetaylt hatt/ die offenbarung des hayligen Euangeliums/ in disen letsten geferlichen zeytten/ auff das sy jm herrlich dancksagen. Zuom dritten den/ die solches wort gottes nit annemen/ sonder verachten/ vnd zuom tayl verfolgen/ ob sy der barmhertzig got auch erleüchtet/ das sy annemen dz trostlich euangelium/ vnd abliessen von dem falschen vertrawen/ zuo erlangen die saeligkait/ mit jren selb erdichten wercken/ in woelchen got kain gefallen hat/ vnd liessen die eer der seligmachung allain Christo vnserm herren/ woelches von got vns geben ist/ zuor weyßhait vnd zuor gerechtigkait/ vnd zuor hayligung/ vnd erloeßung/ Wie Paulus .j. Corinth. j. beschreybt. Auff das also wir semptlich mit ainander anhiengen dem ewigen/ aynigen wort gottes vnuermischt/ vnd also wir ain schaffstall wurden vnsers hyrten Jesu Christ des lebendigen gottes sun/ von yetz an in ewigkait. AMEN Hans Sachs: Die Wittenbergisch Nachtigall. Herausgegeben von Gerald Seufert. Stuttgart 1974, S. 13-15. Microsoft ® Encarta ® 2009. © 1993-2008 Microsoft Corporation. Alle Rechte vorbehalten.